Gürcüstanda azərbaycanlılar arasında doğum səviyyəsi azalıb

Bu ilin birinci yarısında Gürcüstanın azərbaycanlıların yığcam yaşadıqları Kvemo Kartli bölgəsində təbii artım 223 nəfər təşkil edib.

APA-nın yerli bürosu xəbər verir ki, bu barədə Gürcüstanın Milli Statistika İdarəsinin hesabatında bildirilib.

Ötən ilin eyni dövrü ilə müqayisədə təbii artım 4 nəfər və yaxud 1,83% artıb.

Son üç ildə soydaşlarımız arasında doğum səviyyəsində azalma müşahibə olunur. Bu ilin ilk yarısında Kvemo Kartlidə 1 982 doğum qeydə alınıb, bu isə 2025-ci ilin eyni göstəricisindən 19 nəfər, 2024-cü ilin eyni göstəricisindən isə 192 nəfər azdır.

Bölgədə nikahların sayı 1 302, boşanmaların sayı isə 674 təşkil edib.

Hesabat dövründə ümumilikdə Gürcüstan üzrə təbii artım azalaraq mənfi 4 715 nəfər təşkil edib. Müsbət təbii artım Tbilisidə (424 nəfər) və Acarıstanda (330 nəfər) qeydə alınıb. Qonşu ölkə üzrə nikahların sayı 10 006, boşanmaların sayı isə 6 095 olub.