Restoranda Vətən müharibəsi iştirakçısının qətlinə görə tutulan şəxslərin məhkəmə istintaqı yekunlaşıb

Bakıda restoranda hərbçini qətlə yetirməkdə təqsirləndirilən Orxan Zeynalov və İlqar Abdurahmanovun məhkəmə prosesi davam etdirilib.

APA xəbər verir ki, bu gün Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən prosesdə məhkəmə istintaqı tamamlanıb.

Daha sonra dövlət ittihamçısı çıxış üçün vaxt istəyib.

Proses avqustun 21-də davam etdiriləcək.

Qeyd edək ki, hadisə ötən il martın 16-da metronun 20 Yanvar stansiyası yaxınlığındakı restoranda mahnı sifarişinə görə baş verib. Qətlə yetirilən baş gizir Cəsarət Vəliyev 44 günlük Vətən müharibəsində və 12-14 sentyabr Ermənistanın genişmiqyaslı təxribatlarının qarşısının alınması zamanı döyüş əməliyyatlarında şəxsi igidlik və şücaət nümayiş etdirərək “İgidliyə görə”, “Cəbrayılın azad olunmasına görə” və Zəngilanın azad olunmasına görə” medalları ilə təltif edilib.

Təqsirləndirilən Orxan Zeynalov və İlqar Abdurahmanova Cinayət Məcəlləsinin 120.2.1, 120.2.2, 29,120.2.1, 29,120.2.2 ( bir qrup şəxs tərəfindən xuliqanlıq niyyəti ilə qəsdən adam öldürmə və qəsdən adam öldürməyə cəhd) və digər maddələri ilə cinayət işi açılıb.

Qətlə yetirilən C.Vəliyev DSX-nin baş giziri olub. Hadisə xidmətdənkənar vaxtda, baş verib.