“Bitcoin”in qiyməti yenidən 80 min dollardan aşağı düşüb

Kriptovalyuta bazarında son sutka ərzində qarışıq dinamika müşahidə olunur.

“APA-Economics” xəbər verir ki, “CoinMarketCap” platformasında “Bitcoin” son 24 saatda 0,52% ucuzlaşaraq 79 621,90 ABŞ dollarına enib.

“Ethereum” 0,36% azalaraq 2 498,95 dollara, BNB 2,51% ucuzlaşaraq 745,61 dollara, “Monero” 4,40% geriləyərək 532 dollara, “Bitcoin Cash” isə 2,89% azalaraq 255,38 dollara düşüb.

Bununla yanaşı, bəzi kriptovalyutalarda kəskin bahalaşma qeydə alınıb. “Zcash” son sutkada 11,16% artaraq 1 190,12 dollara, “Bittensor” isə 13,83% bahalaşaraq 270,82 dollara yüksəlib.

Qızıl əsaslı kriptovalyutalarda da ucuzlaşma müşahidə olunub. “PAX Gold” (PAXG) 0,68% azalaraq 4 402,05 dollara, “Tether Gold” (XAUT) isə 0,60% geriləyərək 4 399,87 dollara enib.

“CoinMarketCap 20” indeksi son 24 saatda 0,39% azalaraq 164,61 bənd təşkil edib.

“Bitcoin”ə təzyiq ötən həftə ABŞ-da açıqlanan gözləntilərdən güclü əmək bazarı göstəricilərindən sonra FED-in sentyabrda faiz artıra biləcəyi ehtimalının yüksəlməsi ilə əlaqələndirilir. Hazırda bazar iştirakçıları sentyabrda faiz artımı ehtimalını təxminən 57% qiymətləndirirlər. İnvestorların diqqəti bu həftə açıqlanacaq ABŞ inflyasiya göstəricilərinə yönəlib.

“Zcash”ın son dövrdəki kəskin yüksəlişinə isə bu aktivə institusional çıxış imkanlarının genişlənməsi və güclü spekulyativ tələbin dəstək verdiyi bildirilir.