Şavkat Mirziyoyev: Özbəkistan COP29 çərçivəsində Azərbaycana hərtərəfli dəstək göstərməyə hazırdır

“Ölkəmiz COP29 çərçivəsində Azərbaycana hərtərəfli dəstək göstərməyə hazırdır”.

APA xəbər verir ki, bu sözləri Özbəkistanın Prezidenti Şavkat Mirziyoyev Şuşada keçirilən Türk Dövlətləri Təşkilatının Dövlət başçılarının qeyri-rəsmi Zirvə görüşündə çıxışında deyib.

O sözü gedən tədbirdə İqlim Dəyişmələri ilə Mübarizə Mərkəzinin yaradılması üzrə razılıq əldə olunacağına inandığını söyləyib:

“Bu region iqlim dəyişiklikləri məsələsində daha çox həssasdır. Mən inanıram ki, biz həmin tədbirdə İqlim Dəyişmələri ilə Mübarizə Mərkəzinin yaradılması üzrə razılıq əldə edə biləcəyik. COP29 Türk Dövlətləri Təşkilatına üzv ölkələr üçün nəhəng tarixi tədbir olacaq. Mən Azərbaycana uğurlar arzulayıram. Biz bu tədbirdə fəal iştiraka və Azərbaycana hərtərəfli dəstək göstərməyə hazırıq. Bu il qarşılıqlı ticarət dövriyyəsində artım gözlənilir və biz bu tendensiyanın davam etməsində maraqlıyıq. Bundan əlavə, TDT çərçivəsində bir sıra rəqəmsal sistemlərin yaradılmasına nail olunub. Ümidvaram ki, təşkilat daxilində Dəmiryollarının İdarəetmə İttifaqının yaradılmasına da nail olacağıq və onun mənzil-qərargahı Daşkənd şəhərində yerləşəcək”.

Ramiz Mikayıloğlu

Fərid Azəri