Türkiyədə təyyarədə bomba xəbərdarlığı edilib, sərnişinlər təxliyə olunub

Ankara-Şanlıurfa reysi ilə hərəkət edən sərnişin təyyarəsində partlayıcı maddənin olması barədə məlumat daxil olub.

APA-nın Türkiyə bürosunun məlumatına görə, bu barədə Şanlıurfa valisi Hasan Işıldak bildirib.

Oktyabrın 5-də saat 19:00-da Ankaradan Şanlıurfaya yola düşən “AJet” aviaşirkətinə məxsus 4180 saylı sərnişin təyyarəsi saat 20:05-də Şanlıurfa GAP Hava Limanına eniş edib.

Məlumata görə, təyyarənin göyərtəsində 136 sərnişin və 7 ekipaj üzvü olub. Onların təhlükəsiz şəkildə təxliyəsi üçün bütün zəruri tədbirlər görülüb.

Təyyarə boşaldıldıqdan sonra təhlükəsizlik qüvvələri tərəfindən göyərtədə partlayıcı maddənin olub-olmamasının müəyyənləşdirilməsi məqsədilə axtarış aparılacaq.