XİN rəhbəri: Şimali Kipr TDT çərçivəsində bütün səylərə töhfə verməyə hazırdır

"Şimali Kipr Türk Respublikasının TDT vasitəsilə regional media və informasiya şəbəkələrinə daxil edilməsi həm həmrəyliyin ifadəsidir, həm də ədalət üçün zəruri addımdır".

APA xəbər verir ki, bu sözləri Təşkilatın müşahidəçi üzvü, Şimali Kipr Türk Respublikasının xarici işlər naziri Tahsin Ertuğruloğlu Türk Dövlətləri Təşkilatının media və informasiya üzrə məsul nazirlərinin və yüksəkvəzifəli rəsmilərinin 7-ci toplantında çıxışı zamanı deyib.

"Biz beləliklə, türk dünyasının hər bir parçasının qlobal səhnədə ədalətli və düzgün şəkildə təmsil olunmasını təmin edə bilərik", - o qeyd edib.

Tahsin Ertuğruloğlu informasiya sahəsində qlobal məhdudiyyətlərlə üzləşən Şimali Kipr Türk Respublikasının təcrübəsinin TDT ölkələri üçün faydalı ola biləcəyini vurğulayıb: "Şimali Kipr Türk Respublikası TDT çərçivəsində bütün səylərə töhfə verməyə tam hazırdır. Tarixi təcrübə ilə formalaşmış qurumlarımız birgə layihələrdə iştirak etməyə, bilik mübadiləsinə və türk dünyası çərçivəsində potensialın artırılmasına yönəlmiş təşəbbüslərə açıqdır".