Şahruddin Məhəmmədəliyev: “Qarabağ”ın məğlub edə bilməyəcəyi komanda yoxdur"

Azərbaycan millisinin və “Adana Demirspor”un qapıçısı Şahruddin Məhəmmədəliyev apasport.az saytına müsahibə verib. 29 yaşlı qolkiper həm Türkiyə klubundakı işlərindən, həm də milli komanda haqqında danışıb.

- İki gün öncə Superliqanın 18-ci turunda “Başakşehir”lə səfərdə oynadın və İstanbulda rəqibinizlə 0:0 hesablı bərabərə qaldınız. Matç sizin üçün necə keçdi? - Bəli, səfərdə rəqibimizlə heç-heçə oynadıq. Əsas odur ki, bu görüşdə qol buraxmadım. Prinsipcə, “Başakşehir”ə qalib də gələ bilərdik. Amma düzü, uduza da bilərdik. Əsas odur, xal qazandıq və aktivimizdəki xalların sayını artırdıq.

- Superliqada 14-cü turdan bu yana meydana əsas heyətdə çıxırsan. Artıq Türkiyə Superliqasına öyrəşmisən? - Düzü, məndə elə düşüncə yoxdur ki, artıq birinci qapıçıyam. İmkan verilirsə, oynayıram. Allah qoysa, oynamağa və inkişaf etməyə davam edəcəm. Meydana çıxanda da ən yaxşısını göstərirəm ki, “Adana Demirspor”a kömək edim.

- “Qalatasaray”la matçda komandan uduzsa da, yaxşı performans nümayiş etdirdiyini demək olar. Səfərdəki görüş sənin üçün daha yaddaqalan alındı? - Təbii ki, “Qalatasaray”a qarşı səfərdə oynamaq çətin idi. Amma sizə deyim ki, həmin görüşdə biz rahatlıqla xal qazana bilərdik. Çünki hesabı bərabərləşdirmək və qol vurmaq üçün yaxşı şanslarımız olmuşdu. Təəssüf ki, bunu edə bilmədik. Məncə, “Qalatasaray”la görüşdə minimum 1 xalı əlimizdən qaçırdıq.

- “Qarabağ” və “Adana Dəmirspor” arasında hansı fərq var? - “Qarabağ” və “Adana Dəmirspor” tamam fərqli komandalardır. Türkiyə və Azərbaycan çempionatları da həmçinin. Ona görə də, müqayisə etmək çətindir. Hər halda, mən hər iki komandada əlimdən gələni etmişəm.

- Türkiyə mətbuatında yayılan xəbərlərə görə, “Adana Dəmirspor”da maliyyə problemləri var. Maaşlarınızı verirlər? - Bəli, klubda bəzi maliyyə problemləri var. Amma bunlar hamısı həll olunur. Klub bəzi oyunçularla artıq yollarını ayırıb. Bəzi maliyyə problemləri olsa da, gözləyirəm. Hər şeyin yaxşı olacağına dair söz veriblər. Biz də gözləyirik.

- “Adana Dəmirspor”da oynamaq şansı verilməsəydi, komandanı tərk etməyi düşünəcəkdin? - Komandaya gələndən bu yana məşqlərdə əlimdən gələni edirəm. Xeyr, komandanı dəyişmək haqda düşünmürəm. İndi öz üzərimdə işləyirəm. Niyyətim “Adana Dəmirspor”a maksimum dərəcədə kömək olmaqdır. Meydana çıxmaq şansı veriləndə də, maksimumu edirəm ki, komandaya xeyir verim.

- Yeri gəlmişkən, Azərbaycan milli komandasına baş məşqçi axtarışları davam edir. Hələ ki, konkret ad yoxdur. Bu haqda nə düşünürsən? - Bilirsiz, əsas odur ki, AFFA-nın təyin edəcəyi baş məşqçi həm milli komandamıza, həm də Azərbaycan futboluna xeyir versin. Çünki artıq milli komandaya sevgini bərpa etməyin, insanları stadionlara qaytarmağın vaxtıdır. Futbolu insanlara sevdirmək lazımdır. Bunun üçün nəticələr lazımdır. Hətta yaxşı olmayan oyunla olsa belə, qələbə vacibdir, qələbə varsa, bunu etmək olar. Çünki indi daha çox nəticəyə baxırlar, nəinki oyuna. Ona görə də, nəticələr qazanmaq lazımdır. İndiki futbolçularımız da yaxşıdır. Məncə, milli olaraq nəyəsə nail ola bilərik. Əgər bizə inansalar, bu baş verər.

- Sabiq komandan “Qarabağ” Avropa Liqasının pley-off mərhələsində “Braqa” ilə qarşılaşacaq. Necə düşünürsən, Azərbaycan çempionu “Braqa” səddini keçə biləcək? - Hər şeydən əvvəl “Qarabağ”a uğurlar arzulayıram. Təbii ki, mən hər zaman onlara inanıram. “Braqa” da yaxşı rəqibdir. Amma keçilməz deyil. Mən elə düşünürəm ki, orada “Qarabağ”ın məğlub edə bilməyəcəyi komanda yoxdur. Allah qoysa, “Qarabağ” istədiyi nəticələri qazanar.