Misirin Baş Müftisinin müşaviri: Avropada, xüsusilə Fransada islamofobiya təzahürləri artır

Avropa ölkələrində, xüsusilə də Fransada islamofobiya təzahürləri artır.

APA xəbər verir ki, bunu Misir Baş müftisinin Baş müşaviri, Ümumdünya Fətva Evlərinin Baş katibi İbrahim Nəcim Bakıda keçirilən "Müxtəlifliyin qorunması: 2024-cü ildə İslamofobiya ilə mübarizə" mövzusundakı beynəlxalq elmi konfransda panel müzakirə zamanı deyib:

"İslamofobiya həm də konkret olaraq, dezinformasiyanın nəticələrindən formalaşır. Dini qurumlar, müsəlman, ruhani liderlə önə çıxaraq, islam adından danışmır - söhbət bizim başa düşdüyümüz əsl islami məqamlardan gedir. Bu da yanlış düşüncənin formalaşmasına gətirib çıxarır".

İbrahim Nəcim təəssüflə qeyd edib ki, islam adından yanlış danışan adamlar islamofobiyaya təkar verirlər: "Monitorinq və müşahidə bütün parametrlərdə ciddi alətdir. Məhz islamaofobik düşüncəni önləmək üçün də bu cür monitorinqlərə ehtiyac var. Çox təəssüf ki, islam ölkələrində monitorinq alətləri yox dərəcəsindədir. Yəni bizim monitorinq mexanizmlərimiz işlənməlidir. Bu, vacibdir".

Baş katib Azərbaycanın bu kontekstdə lider ölkə ola biləcəyini bildirərək, digər aidiyyəti qurum və təşkilatları, dövlətləri monitorinq mexanizmini formalaşdırmaq üçün Bakıya dəstəyə səsləyib:

"Ümumiyyətlə, islam haqqında danışan kəslər mütləq şəkildə xüsusi ritorikaya uymalı, yanlış fikir formalaşdıracaq nitqlərdən çəkilməlidirlər. Eləcə də islamofobik düşüncəni aradan qaldırmaq üçün nüfuzlu universitetlərlə də işbirliyi vacibdir".