KİV: Müctəba Xamenei müharibə dövründə ictimaiyyət qarşısına çıxmayacaq

İranın Ali Rəhbəri Ayətullah Müctəba Xamenei ABŞ və İsraillə hərbi münaqişə davam etdiyi müddətdə ictimaiyyət qarşısına çıxmayacaq.

Bu barədə TASS-a iranlı mənbə məlumat verib.

Mənbənin sözlərinə görə, Xamenei təhlükəsizlik səbəbi ilə yaxın gələcəkdə ictimaiyyət qarşısına çıxmayacaq.

“Hökumət vəziyyətin normallaşmasını gözləyir. O, bundan sonra ictimaiyyət qarşısına çıxacaq”, - mənbə deyib.

O qeyd edib ki, Müctəba Xamenei müharibə və təhlükəsizlik səbəbi ilə əlaqədar olaraq ictimai məkanlara getmir.

İranlı mənbə onu da əlavə edib ki, Ali Rəhbərin ilk beynəlxalq təması Rusiya Prezidenti Vladimir Putinlə ola bilər.

Belə ki, Müctəba Xamenei Putinlə telefon danışığı apara və yaxud görüş keçirə bilər.

“Rusiya bizə yaxın ölkədir, Putin İslam Respublikasının yaxın dostudur. Və bəlkə də ilk telefon danışığı və ilk görüş Prezident Putinlə olacaq”, - mənbə vurğulayıb.

Qeyd edək ki, Müctəba Xamenei fevralın 28-də ABŞ və İsrailin İrana hücumu zamanı öldürülən atası Seyid Əli Xameneinin yerinə seçilib.