Beyrutda pirotexniki vasitələrin olduğu anbarda güclü partlayış olub

Livanın paytaxtı Beyrutun şərqində yerləşən anbarda pirotexniki vasitələrin partlaması nəticəsində yanğın baş verib.

APA xəbər verir ki, hadisə paytaxtın şərqindəki Metn rayonunun Curət əl-Bəlut qəsəbəsində qeydə alınıb.

Belə ki, partlayış yaşayış binasının birinci mərtəbəsində yerləşən fişəng və pirotexniki vasitələr anbarında baş verib. Yanğın nəticəsində binanın bir neçə mənzilinin eyvanına da alov keçib.

Livan Mülki Müdafiə Xidmətinin əməkdaşları yanğını nəzarətə götürüblər. Alovun yenidən yayılmasının qarşısını almaq üçün soyutma işləri davam etdirilib.

Hadisə nəticəsində xəsarət alanlar və dəymiş ziyanın miqyası barədə məlumat verilməyib.