SDQ silahlıları Hələbin Şeyx Maqsud məhəlləsindən çıxmaqdan imtina edib

Suriya Demokratik Qüvvələrinin (SDQ) silahlıları əldə olunan razılaşmaya zidd olaraq, Hələbin Şeyx Maqsud məhəlləsindən çıxmaqdan imtina ediblər.

APA xəbər verir ki, bu barədə SANA agentliyi məlumat verib.

Mənbələrin bildirdiyinə görə, SDQ silahlıları onları ərazidən çıxartmağa çalışan təhlükəsizlik qüvvələrinə atəş açıblar. Silahlıların təxliyəsi üçün göndərilən avtobuslar isə boş ərazini tərk edib.

Məlumata görə, SDQ üzvləri həmin ərazini tərk etmək istəyən mülki şəxsləri dayandırmaq üçün hədələyirlər.

Qeyd edək ki, Suriya Müdafiə Nazirliyi Hələbin Suriya Demokratik Qüvvələrinin əlində olan ərazilərində atəşkəs elan edildiyini bəyan edib. Xatırladaq ki, SDQ-yə verilən vaxt artıq başa çatıb. Suriya ordusu ölkənin ərazi bütövlüyünü təmin etmək üçün PKK/YPG mövqelərini bombalamağa başlayıb.

Hələbdə SDQ və Suriya ordusu arasındakı toqquşmalarda ölən mülki şəxslərin sayı 21-ə çatıb, 55 nəfər yaralanıb.

100 000-dən çox insan döyüşlərin getdiyi Şeyx Məqsud və Əşrəfiyyə məhəllələrini tərk edib.