XİN: Brüsselin siyasəti Gürcüstan-Aİ tərəfdaşlığına ziyan vurur

Gürcüstan Baş nazirinin müavini, xarici işlər naziri Maka Boçorişvili Avropa İttifaqının (Aİ) səfiri Pavel Herçenski ilə görüş keçirib.

APA-nın yerli bürosu xəbər verir ki, görüşdə Brüsseldə təşkil olunan tədbirdə səfirin Gürcüstanla bağlı səsləndirdiyi bəyanatlarla bağlı narazılıq ifadə olunub.

XİN başçısı qeyd edib ki, Brüsselin Tbilisiyə münasibətdə hazırkı siyasəti, atdığı addımlar və bəyanatları Gürcüstan və Aİ arasında etimadı sarsıdır və tərəfdaşlığa ziyan vurur.

Nazir bildirib ki, Brüsselin hərəkətlərini yalnız Gürcüstan cəmiyyətinin bundan sonrakı qütbləşməsinə və radikal gündəmin təşviqinə yönəlmiş addımlar kimi qiymətləndirmək olar.

Boçorişvili vurğulayıb ki, Gürcüstan hakimiyyəti konstruktiv dialoqa hazırdır və Aİ-dən ədalətli və hörmətə əsaslanan münasibət gözləyir.

Qeyd edək ki, Pavel Herçenski bir neçə gün öncə Gürcüstanın yol ayrıcında olduğunu deyib. Səfirin sözlərinə görə, Gürcüstanın vətəndaş müharibəsi, yoxsulluq, məhrumiyyətlər və korrupsiyanın olduğu qaranlıq dövrə qayıtmasına yol verilməməlidir.