“Rospotrebnadzor” Ermənistanın “Cermuk” mineral suyunun idxalını və satışını dayandırıb - YENİLƏNİB

Rusiyada Ermənistanın “Cermuk” markalı mineral suyunun idxalı və satışı dayandırılıb. APA-nın Moskva bürosunun məlumatına görə, bu barədə “Rospotrebnadzor” açıqlama yayıb.

Qurum bildirib ki, aparılan yoxlamalar zamanı mineral suyun tərkibində bikarbonat ionlarının, xloridlərin və sulfatların yüksək səviyyədə olduğu müəyyən edilib.

Qeyd olunub ki, bu hal məhsulun müalicəvi xüsusiyyətləri ilə bağlı istehlakçılarda yanlış təsəvvür yarada və sağlamlığa mənfi təsir göstərə bilər.

Açıqlamaya əsasən, müvəqqəti sanitariya tədbiri yalnız müəyyən istehsal tarixlərinə aid məhsullara şamil olunur.

*** 10: 50 Rusiyanın “Çestnıy znak” dövlət markalama sistemi Ermənistan istehsalı “Cermuk” mineral suyunun mağazalarda satışını dayandırıb.

APA xəbər verir ki, bu barədə Perspektiv Texnologiyaların İnkişafı Mərkəzinin baş direktorunun müavini Revaz Yusupov bildirib.

Onun sözlərinə görə, dövriyyədə olan 338 min şüşəlik partiya yoxlama başa çatanadək satışdan kənarlaşdırılıb.

Məhsulun dövriyyəsinin dayandırılmasına səbəb kimi Rusiyanın İstehlakçı Hüquqlarının Müdafiəsi və İnsan Rifahına Nəzarət Federal Xidmətinin (Rospotrebnadzor) məktubu göstərilib. Məktubda “Rusiya vətəndaşlarının həyat və sağlamlığına mümkün zərərin qarşısının alınması üçün təcili tədbirlərin görülməsinin vacibliyi” qeyd olunub.

Bloklamanın səbəbi kimi isə “məcburi tələblərin pozulması” göstərilib.

Qadağa 17 fevral 2026-cı il və 5 mart 2026-cı il istehsal tarixli məhsullara şamil edilib.

Yusupov əlavə edib ki, “yoxlama başa çatana qədər həmin məhsullar istehlakçıların əlinə keçməyəcək”.