QDTİB fəaliyyətə başladığı vaxtdan layihələrə 9 mlrd. avrodan çox vəsait ayırıb

Qara Dəniz Ticarət və İnkişaf Bankı fəaliyyətə başladığı vaxtdan etibarən müxtəlif layihələrin maliyyələşdirilməsinə 9 milyard avrodan çox vəsait yönəldib.

"APA-Economics" xəbər verir ki, bu barədə QDTİB-nin vitse-prezidenti Ziya Əliyev Qara Dəniz Ticarət və İnkişaf Bankının (QDTİB) Rəhbərlər Şurasının 28-ci İllik Toplantıları çərçivəsində təşkil olunan Biznes Forumunda bildirib.

O qeyd edib ki, bankın digər mühüm funksiyası regionda inkişaf səviyyələri arasındakı fərqlərin azaldılmasına töhfə verməkdir:

"Qara Dəniz regionu iqtisadi və maliyyə inkişafı baxımından kifayət qədər müxtəlifdir. Buna görə də biz daha az inkişaf etmiş, maliyyəyə çıxışı məhdud olan sektor və ölkələrə üstünlük veririk".