Filarmoniyada "Bülbül vokal məktəbi" adlı konsert proqramı keçirilib

Müslüm Maqomayev adına Azərbaycan Dövlət Filarmoniyasında Azərbaycan vokalçıları III beynəlxaq festivalı çərçivəsində dahi Bülbülün əziz xatirəsinə həsr olunmuş "Bülbül vokal məktəbi" adlı kosert proqramı keçirilib.

APA xəbər verir ki, tədbirin açılış mərasimində Bülbülün nəvəsi, bəstəkar, müğənni, Azərbaycan Respublikasının Rusiya Federasiyasında fövqəladə və səlahiyyətli səfiri Polad Bülbüloğlu çıxış edib.

O Bülbül vokal məktəbinin önəmindən, Azərbaycan klassik musiqisinə verdiyi töhfələrdən danışıb.

Daha sonra Azərbaycan Dövlət Opera və Balet Teatrının simfonik orkestrinin ifasında Koroğlu operasından Uvertüra və Çənlibel xoru səsləndirilib.

Konsertdə Azərbaycanın xalq artistləri Yusif Eyvazov, Azər Zeynalov, Fidan Hacıyeva, Gülnaz İsmayılova, əməkdar artistlər İlahə Əfəndiyeva, Ramil Qasımov, Fəridə Məmmədova, Elnarə Məmmədova, Anton Ferştandt, İnarə Babayeva, həmçinin müğənnilər Mahir Tağızadə və Taleh Yəhyayev çıxış ediblər.

Sonda xalq artisti Yusif Eyvazovun ifasında ilk dəfə Ulu öndər Heydər Əliyevin 100 illiyinə həsr olunmuş "Rekviem" səsləndirilib.