Kreml: Türkiyədə Zelenskiyə qaz kəmərlərinə qarşı hücumların qəbuledilməzliyinin xatırladıldığına ümid edirik

Kreml Serbiyadakı qaz boru kəmərində tapılan partlayıcı qurğularla bağlı vəziyyətdə Ukrayna müdaxilə izlərinin tapılacağını iddia edib.

APA-nın Moskva bürosu xəbər verir ki, Rusiya prezidentinin mətbuat katibi Dmitri Peskov vəziyyətin potensial olaraq çox təhlükəli olduğunu söyləyib.

Onun sözlərinə görə, həm Türk Axını, həm də Mavi Axın boru kəmərlərinin müxtəlif hissələri olan infrastruktur Ukrayna tərəfindən dəfələrlə hücuma məruz qalıb.

"Bilirik ki, hazırda həddindən artıq gərginlik altında işləyən bu həyati əhəmiyyətli enerji arteriyasına qarşı Avropa ərazisinə edilən hücumların arxasında kimin dayandığına dair hələlik etibarlı bir dəlil yoxdur. Bildiyimiz kimi, əvvəllər Ukrayna kritik enerji infrastrukturuna qarşı bu cür təxribat aktlarında birbaşa iştirak edib.

Bu dəfə də Ukraynanın bəzi müdaxilə izlərinin aşkarlanması ehtimalı yüksəkdir. Rusiya əlbəttə ki, bu infrastrukturun təhlükəsizliyini təmin etmək üçün lazımi tədbirlər görür. Ümid edirik ki, həm Macarıstan, həm də Serbiya bu neft və qaz boru kəmərlərinə təhlükəni minimuma endirmək üçün tədbirlər görəcək. Həmçinin ümid edirik ki, Ankarada Zelenski ilə son təmaslar zamanı Ukrayna liderinə Cənub Axını və Mavi Axın infrastrukturuna qarşı bu cür aqressiv hərəkətlərin qəbuledilməzliyi xatırladılıb",- Kremlin sözçüsü vurğulayıb.