ABŞ-ın müharibə naziri: Çin ölkəmizin təhlükəsizliyini təhdid edə bilməməlidir

ABŞ zəngin dövlətlərin müdafiəsini maliyyələşdirməyəcək.

APA xəbər verir ki, bunu ABŞ müharibə naziri Pit Heqset Sinqapurda keçirilən "Şanqri-La Dialoqu" beynəlxalq təhlükəsizlik forumunda çıxışında deyib.

“ABŞ-ın zəngin dövlətlərin müdafiəsini subsidiyalaşdırdığı dövr başa çatıb. Bizə protektoratlar deyil, tərəfdaşlar lazımdır”, - o qeyd edib.

Heqset bildirib ki, alyanslar yalnız qarşılıqlı məsuliyyət əsasında işləyə bilər:

“Müttəfiqliklər yalnız həqiqi tərəfdaşlıq olduqda işləyir. Bu, ikitərəfli hərəkət küçəsidir. Hər kəs özünü riskə atmadan güclü alyans ola bilməz. Burada havayı sərnişinlərə yer yoxdur”.

O əlavə edib ki, müttəfiqliklərin gücü simvolik jestlərlə deyil, real hərbi imkanlarla ölçülür:

“Tarix hələ bitməyib. Müttəfiqliklər bayraqların sayı ilə deyil, döyüş bölmələrinin sayı ilə qiymətləndirilir. Bağışlayın ki, bunu burada deyirəm: daha az Şanqri-La Dialoqu, daha çox gəmi və sualtı qayıq lazımdır”.

ABŞ müharibə naziri Vaşinqtonun regionda qüvvələr balansını qorumağa çalışdığını vurğulayıb:

“ABŞ-ın məqsədi amerikalıların və müttəfiqlərimizin maraqlarına uyğun dayanıqlı qüvvələr balansını qorumaqdır. Heç bir dövlət, o cümlədən Çin hegemonluq qura və ölkəmizin təhlükəsizliyini təhdid edə bilməməlidir”.