Elnur Məmmədov ABŞ nümayəndə heyəti ilə strateji tərəfdaşlığı müzakirə edib

Xarici işlər nazirinin müavini Elnur Məmmədov ABŞ Dövlət katibinin Avropa və Avrasiya məsələləri üzrə köməkçisinin müavini, ABŞ-Azərbaycan Strateji İşçi Qrupunun həmsədri Sonata Koulterin rəhbərlik etdiyi nümayəndə heyəti ilə görüşüb. APA Xarici İşlər Nazirliyinə istinadən xəbər verir ki, görüşdə Azərbaycan-ABŞ münasibətlərinin inkişafı, Strateji Tərəfdaşlıq Xartiyası çərçivəsində əməkdaşlıq perspektivləri, iqtisadi əlaqələrin genişləndirilməsi, enerji təhlükəsizliyi və regional bağlantılar müzakirə olunub.

Tərəflər strateji tərəfdaşlığın möhkəmləndirilməsinin vacibliyini vurğulayıb və iyunun 2-də Bakıda keçiriləcək Azərbaycan-ABŞ İqtisadi Dialoqunun ilk iclasının ikitərəfli əməkdaşlığa əlavə töhfə verəcəyini bildiriblər.

Görüş zamanı iqtisadi və ticarət əlaqələrinin dərinləşdirilməsi, enerji və nəqliyyat sahələrində əməkdaşlığın genişləndirilməsi, həmçinin regional sabitlik və rifahın təşviqi istiqamətində dialoqun davam etdirilməsi niyyəti ifadə olunub.