KİV: Ukrayna Rusiya hərbi-sənaye kompleksinə zərbələrin sayına görə rekord müəyyənləşdirib

İyun ayı Ukraynanın Rusiyanın hərbi-sənaye kompleksi müəssisələrinə endirdiyi hava zərbələrinin sayına görə, 2026-cı ilin ən intensiv dövrü olub.

UNİAN məlumat verir ki, ay ərzində azı 13 obyektə hücum edilib ki, bu da ilin əvvəlindən bəri qeydə alınan ən yüksək göstəricidir.

Son hədəflərdən biri Volqoqraddakı "Titan-Barikadı" zavodu olub. Rusiya rəsmiləri müəssisənin adını açıqlamasalar da, Volqoqrad vilayətinin qubernatoru Andrey Boçarov zavodlardan birinin istehsal sahələrinin zədələndiyini bildirib. Hadisə nəticəsində bir işçi ölüb, daha 11 nəfər yaralanıb.

Ukrayna Prezidenti Volodimir Zelenski zərbənin FP-5 "Flaminqo" qanadlı raketləri ilə endirildiyini açıqlayıb. Ukraynalı OSINT analitiklərinin məlumatına görə, hədəf məhz "Titan-Barikadı" zavodu olub.

Müəssisədə "Yars", "Topol-M", "Sarmat" strateji raket kompleksləri və "İsgəndər-M" operativ-taktiki raket kompleksləri üçün buraxılış qurğuları istehsal edilir. Bundan başqa, zavodun "Oreşnik" raket kompleksinin istehsalında da iştirak etdiyi bildirilir.

İyun ərzində Ukrayna qüvvələri Rusiyanın müdafiə-sənaye kompleksinə daxil olan bir sıra digər müəssisələrə də zərbələr endirib. Onların arasında Miçurinskdə raket və aviasiya texnikasının idarəetmə sistemləri üçün avadanlıq istehsal edən "Proqress" zavodu, Ryazan vilayətində aviasiya bombaları, artilleriya sursatları və yüksək dəqiqlikli silahlar üçün komponentlər istehsal edən "Elastik" zavodu, Çeboksarı şəhərində "İsgəndər-M", "Kalibr" raketləri və pilotsuz uçuş aparatları üçün naviqasiya avadanlığı hazırlayan "VNIİR-Proqress" müəssisəsi yer alır.

Həmçinin gecəgörmə cihazları üçün komponentlər istehsal edən "Ekran-Optik Sistemlər" zavodu, Rusiyanın müdafiə müəssisələri reyestrinə daxil olan "Tolyattikauçuk" və "Nijnekamskneftxim" müəssisələri, məhsulları artilleriya sursatlarının istehsalında istifadə olunan "Azot" kimya zavodu, raket və zenit-raket kompleksləri üçün elektronika istehsal edən Voronej Yarımkeçirici Cihazlar Zavodu, Orenburq qaz emalı və helium zavodları, eləcə də işğal altında olan Krımdakı "Zatoka" gəmiqayırma zavodu da hücuma məruz qalan obyektlər sırasında olub.

Jurnalistlərin hesablamalarına görə, 2026-cı ilin əvvəlindən Rusiyanın hərbi-sənaye kompleksi obyektlərinə ümumilikdə azı 48 hava zərbəsi endirilib. İyundan sonra ən intensiv ay mart olub və həmin dövrdə 11 hücum qeydə alınıb. Fevral və apreldə yeddi, yanvar və mayda isə beş zərbə endirilib.

Analitiklər qeyd edirlər ki, iyun ayı hədəflərin müxtəlifliyi baxımından da fərqlənib. Ukrayna zərbələri raket, elektronika və sursat istehsalçılarına, kimya müəssisələrinə, gəmiqayırma zavodlarına və ağır maşınqayırma sənayesinə yönəlib.