AMB BOKT-ların borclanmasına yeni hədlər müəyyən edib

Azərbaycanda bank olmayan kredit təşkilatlarının (BOKT) öhdəliklərinin kapitala nisbəti üzrə üç hədd müəyyən edilib.

"APA-Economics" xəbər verir ki, bunu Azərbaycan Mərkəzi Bankının (AMB) Bank olmayan kredit təşkilatlarının fəaliyyətinə nəzarət departamentinin direktoru Xəyyam İsmayılov bildirib.

Onun sözlərinə görə, BOKT-ların öhdəliklərinin kapitala nisbəti üzrə 1, 3 və 10 misli hədlər nəzərdə tutulub.

Xəyyam İsmayılov qeyd edib ki, hazırda Azərbaycanda BOKT-ların istehlak kreditləri üzrə orta faiz dərəcəsi 35% təşkil edir. Tətbiq edilən yanaşmanın əsas məqsədi BOKT-ların cəlb etdikləri vəsaitləri müştərilərə daha yüksək faizlə təqdim etməsinin qarşısını almaq və təşkilatların kifayət qədər kapitala malik olmasını təmin etməkdir.

“Məsələn, BOKT-un kapitalı 5 milyon manatdırsa, onun öhdəlikləri 5 milyon və ya 15 milyon manat səviyyəsində ola bilər. Lakin BOKT-un istehlak kreditləri üzrə faiz dərəcəsi açıqlanan orta faiz dərəcəsi üçün müəyyən edilmiş həddi keçmirsə, bu halda kapitalının 10 mislinə qədər öhdəlik cəlb edə bilər”, – deyə AMB rəsmisi bildirib.

O əlavə edib ki, öhdəliklərini davamlı artıran BOKT-lar əlavə risklər formalaşdırdığı üçün bu sahədə kapital tələblərinin qorunması vacibdir.