Mərakeşdə 4 partiyanın razılığı ilə koalisiya hökuməti qurulub

Mərakeşdə sentyabrın 30-dan bəri davam edən hökumətin formalaşdırılması ilə bağlı danışıqların ikinci mərhələsindən sonra dörd siyasi partiya yeni hökumət çoxluğunun yaradılması barədə razılığa gəlib.

APA xəbər verir ki, Mərakeşdə Liberal yönümlü Əsilzadəlik və Müasirlik Partiyası (PAM), mühafizəkar İstiqlal Partiyası, sol yönümlü Xalq Qüvvələrinin Sosialist İttifaqı (USFP) və Tərəqqi və Sosializm Partiyası (PPS) koalisiya yaratmaq barədə razılığa gəliblər.

Birgə bəyanatda hökumət proqramının ən qısa müddətdə hazırlanaraq həyata keçiriləcəyi bildirilib. Həmçinin nazir vəzifələrinə peşəkar, siyasi uzaqgörənliyə və dürüstlüyə malik namizədlərin irəli sürüləcəyi, güclü və uzlaşmış hökumətin qurulacağı vurğulanıb.

Mərakeş kralı VI Məhəmməd sentyabrın 29-da keçirilən seçkilərdə 97 mandat qazanaraq birinci yeri tutan PAM-ın lideri Fatimə Zəhra Mənsuriyə hökuməti formalaşdırmağı tapşırıb.

Qeyd edək ki, Mərakeş Nümayəndələr Palatasında ümumilikdə 395 yer var. Hökumət çoxluğunu təmin etmək üçün ən azı 198 mandat tələb olunur. Koalisiyaya daxil olan partiyalardan PAM 97, İstiqlal Partiyası 65, USFP 26, PPS isə 19 mandat əldə edib.

Beləliklə, dörd partiyanın birləşməsi nəticəsində koalisiya parlamentdə ümumilikdə 207 mandat qazanıb və hökumətin etimad səsverməsindən keçməsi üçün tələb olunan həddi aşıb.