ABŞ-ın hələ də 115 ölkədə səfiri yoxdur

ABŞ prezidenti Donald Trampın ikinci prezidentlik dövrünün 1,5 ili tamam olmasına baxmayaraq, dünyanın müxtəlif ölkələrindəki 195 səfir postundan 115-nin hələ də boş olduğu bildirilir.

Bu barədə Dövlət Departamenti işçilərini təmsil edən birlik olan ABŞ Xarici Xidmət Məmurları Assosiasiyasının dərc etdiyi məlumatlara əsasən “American Wall Street Journal” (WSJ) qəzeti məlumat verib.

Məlumata görə, Səudiyyə Ərəbistanı, Birləşmiş Ərəb Əmirlikləri (BƏƏ), Qətər, İraq, Küveyt, Rusiya və Ukrayna kimi mühüm ölkələrdə səfirlərin olmaması xüsusilə diqqət çəkir.

Tramp administrasiyası İranla davam edən gərginlik və Rusiya-Ukrayna münaqişəsi kontekstində Yaxın Şərqlə sıx diplomatik əlaqələr saxlasa da, bu ölkələrdə səfirlərin olmaması əhəmiyyətli diplomatik maneə kimi təsvir edilir.

Bundan əlavə, Afrikadakı 51 ABŞ səfirliyindən 37-sində səfirlərin olmadığı qeyd edilib.

Hesabatda həmçinin qeyd olunur ki, Trampın birinci prezidentlik müddətinin təxminən eyni dövründə 188 səfir postundan 45-i boş qaldığı halda Barak Obamanın 2015-ci ildəki ikinci müddətində isə 187 səfir postundan 12-si boş qalıb.

Qeyd edək ki, ABŞ-da səfirlər prezident tərəfindən irəli sürülür və Senat tərəfindən təsdiqlənir.