Zelenski: Cəbhədən 1500 km məsafədə yerləşən Ufadakı iki neft zavoduna zərbələr endirilib

Ukrayna ordusu Rusiyanın Krasnodar regionu və Ufada şəhərindəki neft obyektlərinə zərbələr endirib.

APA xəbər verir ki, bu barədə Ukrayna Prezidenti Volodimir Zelenski “Telegram” kanalında bildirib.

Ukrayna liderinin sözlərinə görə, ötən gecə Ukrayna ordusu Rusiyanın Krasnodar vilayətində yerləşən “Poltavskaya” neft bazasına zərbə endirib.

“Bu gecə Müdafiə Qüvvələrinin bölmələri Krasnodar regionunda yerləşən “Poltavskaya” neft bazasını vurub. Hədəf cəbhə xəttindən təxminən 300 kilometr məsafədə yerləşirdi”, – Zelenski qeyd edib.

Ukrayna lideri qeyd edib ki, səhər saatlarında isə Ukrayna Təhlükəsizlik Xidməti Başqırdıstanın Ufa şəhərində yerləşən “Başneft-Ufaneftxim” və “Başneft-Novoyl” neft emalı zavodlarına zərbələr endirib.

“Bu obyektlər cəbhə xəttindən 1500 kilometr məsafədə yerləşir. Uzaqmənzilli sanksiyalar planımızı həyata keçiririk. Dəqiqliyimizi təmin edən bütün ukraynalı döyüşçülərə təşəkkür edirəm”, – Ukrayna Prezidenti vurğulayıb.