Rusiya MN müharibə başlayandan Ukraynanın 170 minə yaxın dronunun vurulduğunu bildirib

Rusiya Hava Hücumundan Müdafiə vasitələri son 24 saatda Ukrayna Silahlı Qüvvələrinə məxsus 762 dronu vurub.

APA-nın Moskva bürosu xəbər verir ki, bu barədə Rusiya Müdafiə Nazirliyi məlumat yayıb.

Bildirilib ki, ötən sutka ərzində HHM sistemləri 17 idarə olunan aviasiya bombası, iki ABŞ istehsalı HIMARS-ın raketini və 762 təyyarə tipli pilotsuz uçuş aparatını vurub.

Rusiya MN “xüsusi hərbi əməliyyat”ın başlanğıcından bəri ümumilikdə Ukrayna ordusunun 671 təyyarə, 284 helikopter, 168 852 PUA, 663 zenit-raket sistemi, 29 894 tank və digər zirehli döyüş maşını, 1 748 reaktiv yaylım atəşi sistemi, 35 495 səhra artilleriya qurğusu və minaatan, eləcə də 64 864 xüsusi hərbi avtomobil texnikasının məhv edildiyini açıqlayıb.