FHN-in Cənub Regional Mərkəzi Lənkəranda birgə nəzəri-praktiki tədbir keçirib

FHN-nin Cənub Regional Mərkəzinin təşkilatçılığı ilə Lənkəran Peşə Liseyində “Fövqəlada hallarda özünü necə aparmalı” və “Yanğın təhlükəsizliyi qaydalarına əməl etmək, həyat fəaliyyətinin təhlükəsizliyinin qarantıdır” mövzusunda nəzəri-praktiki tədbir keçirib.

APA-nın cənub bürosunun verdiyi məlumata görə, tədbirə FHN-nin Cənub Regional Mərkəzin, Dövlət Yanğın Nəzarəti Xidmətinin Cənub Regional Dövlət Yanğın Nəzarəti idarəsinin, Dövlət Yanğından Mühafizə Xidmətinin Lənkəran Yanğından Mühafizə hissəsinin, Xüsusi Riskli Xilasetmə Xidmətinin “N” saylı hərbi hissənin, Lənkəran Rayon Təcili və Təxirəsalınmaz Tibbi Yardım Stansiyanın qüvvə və vasitələri cəlb olunub. Əvvəlcə nəzəri hissə çərçivəsində təbii və texnogen xarakterli fövqəlada hadisələr zamanı düzgün davranış, ilkin yanğınsöndürmə avadanlıqları və fərdi mühafizə vasitələrindən istifadə qaydaları, təxliyyə barədə danışılıb, suallar cavablandırılıb.

Sonra keçirilən sərgidə tədbir iştirakçılarına yanğınsöndürmə, xüsusi xilasetmə və təcili tibbi yardım avtomobillərində olan xilasetmə avadanlıqlarından, yanğınsöndürmə və təcili tibbi yardım vasitələrindən istifadə qaydaları haqqında ətraflı məlumat verilib. Daha sonra davam etdirilən praktiki hissə çərçivəsində FHN – nin “112” qaynar telefon xəttinə daxil olan şərti yanğın barədə məlumat əsasında tədbirə cəlb olunan qurumların qüvvələri ilə qarşılıqlı fəaliyyətdə peşə liseyinin müəllim və şagird heyətinin “təhlükəli ərazidən” təxliyyə edilməsi, onlara təxirəsalınmaz ilkin tibbi yardımın göstərilməsi, “yanğın” yerində çevik kəşfiyyatın aparılması, xilasetmə və “yanğının söndürülməsi” əməliyyatları yerinə yetirilib.