Rabitəbank özünüməşğulluq proqramı çərçivəsində onlara dəstək verdi

"Rabitəbank" ASC özünüməşğulluq proqramı çərçivəsində müxtəlif kateqoriyalar üzrə şəxsi biznesini qurmaq istəyən aztəminatlı vətəndaşlara dəstək olmaqda davam edir.

“Qafqazinfo” xəbər verir ki, bank əməkdaşları özünüməşğulluq layihəsi ilə bağlı siyahıda olan Bakı şəhəri, Naxçıvan Muxtar Respublikası və Qobustan rayonu üzrə müxtəlif fəaliyyət sahələri ilə məşğul olmaq istəyən daha 6 nəfərə aktivlərin təqdim edilməsini yekunlaşdırıb.

Ramiz Əsgərov və Rasim Cabbarov bankın göstərdiyi dəstək sayəsində şəxsi biznesini qurmağa müvəffəq olublar və onlara dəmirçilik və dülgərlik avadanlıqları təqdim edilib.

Bankın Nərimanov rayon filialının əməkdaşları Pərviz İmanovun poliqrafiya üzrə fərdi sahibkarlıqla məşğul olmaqla bağlı müraciətini müsbət cavablandırıb və o, lazımi avadanlıqlarla təmin olunub.

Rabitəbank ölkədə qadın sahibkarlığının inkişafına da dəstəyini davam etdirməkdədir. Un məmulatlarının istehsalı üzrə şəxsi biznesini qurmaq istəyən Leyla Səfərova, gözəllik salonu açmaq istəyən Sevda Əlizadə, həmçinin maldarlıq təsərrüfatı üzrə şəxsi biznesini qurmaq istəyən Türkanə Vəliyeva bank tərəfindən lazımi və müasir avadanlıqlarla təmin edilib.