ABŞ ikili vətəndaşlığı olan amerikalıların uşaqlarının geri qaytarılmasına mane olan şəxslərə sanksiya tətbiq edəcək

ABŞ ikili vətəndaşlığı olan ailələrdə uşaqların valideynlərdən biri tərəfindən oğurlanmasına şərait yaradan şəxslərə qarşı viza sanksiyaları tətbiq etməyə başlayır.

APA xəbər verir ki, bu barədə ABŞ dövlət katibi Marko Rubio açıqlama verib.

“Digər ölkələrin hökumət rəsmiləri, hakimlər, məhkəmə inzibatçıları, hüquq-mühafizə orqanlarının əməkdaşları və digər şəxslər bu cür işlərin sürətlə həllinə qəsdən mane olduqda, ailə üzvlərinin ayrılığını uzadır və uşaqların ABŞ-a qaytarılmasının qarşısını alırlar”, - deyə ABŞ dövlət katibinin yazılı bəyanatında bildirilib.

Bəyanatda qeyd olunur ki, bununla əlaqədar Vaşinqton belə hallarda düzgün davranmadığını hesab etdiyi şəxslərə ABŞ-a giriş vizalarının verilməsinin məhdudlaşdırılmasına dair yeni siyasət həyata keçirməyə başlayır.

Rubio xəbərdarlıq edib ki, viza məhdudiyyətləri belə şəxslərin ailə üzvlərinə də şamil ediləcək.