İraqın sabiq prezidenti Saleh BMT-nin Qaçqınlar üzrə yeni Ali Komissarı seçilib

BMT İraqın sabiq prezidenti (2018-2022) Bərham Salehin BMT-nin Qaçqınlar üzrə yeni Ali Komissarı vəzifəsinə namizədliyini təsdiqləyib.

APA xəbər verir ki, bu barədə BMT-nin mətbuat xidməti məlumat verib.

"BMT Baş Assambleyası Bərham Əhməd Salehi (İraq) 1 yanvar 2026-cı ildən başlayaraq beş illik müddətə BMT-nin Qaçqınlar üzrə Ali Komissarı vəzifəsinə seçib", - məlumatda deyilir.

O, son 10 ildir bu vəzifəni tutan və səlahiyyət müddəti 2025-ci ilin sonunda başa çatan italyan Filippo Qrandini əvəz edəcək.

Qeyd edək ki, Saleh 1960-cı ildə Süleymaniyyədə anadan olub və Böyük Britaniyada təhsil alıb. 1970-ci illərdə Qərb ölkələri ilə münasibətlərə cavabdeh olan Kürdüstan Vətənpərvərlər Birliyinə qoşulub. 2001-ci ildən 2004-cü ilə qədər İraq Kürdüstanının nazirlər kabinetinə rəhbərlik edib, 2005-ci ildə isə İraq Müvəqqəti Hökumətində Planlaşdırma naziri olub. 2006-cı ildən 2009-cu ilə qədər Nuri əl-Malikinin kabinetində Baş nazirin müavini, 2009-cu ildən 2011-ci ilə qədər isə yenidən Kürdüstan Regional Hökumətinin Baş naziri vəzifəsində çalışıb. 2018-ci ildə parlament səsverməsinin ikinci turunda İraq prezidenti seçilsə də, 2022-ci ildə ikinci müddətə namizədliyində məğlub olub.