İlk ürək transplantasiyası olunan şəxs: Səhhətim yaxşıdır, heç bir problemim yoxdur

“Transplantasiya əməliyyatı uğurla icra edildi. Prezident İlham Əliyevə, Birinci vitse-prezident Mehriban Əliyevaya və üzərimdə əməyi olan bütün həkimlərə təşəkkür edirəm”.

APA xəbər verir ki, bunu Qafqazda və Azərbaycanda meyit donorundan ilk ürək transplantasiyası olunan şəxs Rəşad Məmmədəliyev “Qafqazda ilk ürək transplantasiyası: Azərbaycan səhiyyəsinin tarixi nailiyyəti və gələcək perspektivlər” mövzusunda keçirilən dəyirmi masada çıxışı zamanı bildirib.

O, hər kəsi donorluqdan faydalanmağa çağırıb: “Əməliyyat uğurla icra edildi, səhhətim yaxşıdır, heç bir problemim yoxdur. Əməliyyat etdirməyə qorxsam da, həkimimə inamım var idi. Əməliyyatdan öncə təngnəfəs olurdum, indi hər şey çox yaxşıdır. Artıq əməliyyatdan 4 ay keçib. Əvvəl hərəkət etməkdə çətinlik çəkirdim, indi rahat hərəkət edirəm. Bir neçə dərman qəbul edirəm. Bəzisi ömürlük, bəziləri müddətlidir. Donor ailəsinə, əməyi olan hər kəsə təşəkkür edirəm. Hər kəs donorluqdan rahatlıqla faydalana bilər".