Zelenski müharibə zamanı seçkilərin keçirilməsi üçün əsas şərtləri açıqlayıb

“İki aylıq atəşkəs əldə olunarsa, Ukrayna nəzəri olaraq seçkilər keçirə bilər”.

APA xəbər verir ki, bunu Ukrayna Prezidenti Volodimir Zelenski deyib.

"Düşünürəm ki, tərəfdaşlarımız bir suala cavab verməlidirlər: onlar nə istəyirlər? Onlar əsl seçkilər istəyirlər, yoxsa sadəcə məni əvəz etmək istəyirlər? Düşünürəm ki, ruslar sadəcə məni əvəz etmək istəyirlər. Bunun mədəni bir yolu var - seçkilər. Amma insanlara təsir edə bilməzsən, onlar kiminlə yaşadıqlarını seçməlidirlər", - Zelenski bildirib.

Zelenski vurğulayıb ki, Vaşinqton Ukraynaya sülh gətirə bilsə, o ABŞ-ın müəyyən seçki təkliflərini heç vaxt bloklamaz.

"Əgər bizdə seçkilərin keçirilməsi üçün iki aylıq atəşkəs olsa, mən parlamentlə danışmaq və onları dəstəkləmədikləri – hətta cəmiyyətin də dəstəkləmədiyi – müharibə zamanı seçkilərin keçirilməsinə razı salmaq üçün əlimdən gələni edəcəyəm. Hətta iki aylıq atəşkəs əldə olunsa belə, bu, müharibənin başa çatması demək deyil", - Zelenski əlavə edib.

Eyni zamanda prezident vurğulayıb ki, bunun üçün insanlar sülh məsələsi ilə bağlı referendumda öz mövqelərini bildirməli, parlament isə qüvvədə olan qanunvericiliyə dəyişikliklər etməlidir.