Ekspert: Vahid geyim forması ilə bağlı qərara əməl etmək sağlam təhsil mühitinin formalaşması üçün zəruridir

Məktəblərdə sosial bərbərliyin qorunması baxımından vahid məktəbli formasından istifadə zəruridir.

Bunu APA-ya açıqlamasında təhsil məsələləri üzrə mütəxəssis Elçin Əfəndi deyib.

O bildirib ki, təhsil müəssisələrində normal və sağlam mühitdə təhsil prosesinin həyata keçirilməsi və tədrisin təşkili vacib şərtdir: “Çünki biz nizam-intizam olan yerdə uğur, nailiyyət əldə edə bilirik. Ona görə də normal tədris prosesinin olması üçün sağlam təhsil mühiti olmalıdır. Bu baxımdan, Nazirlər Kabinetinin təhsilalanların və təhsilverənlərin vahid geyim forması ilə bağlı müvafiq qərarına əməl etmək həm sosial bərbərliyin qorunması baxımından sağlam təhsil mühitinin formalaşması, həm də dünyəvi təhsilin bərqərar olması üçün zəruridir. Vətəndaşlar Nazirlər Kabinetinin müvafiq qərarına mütləq riayət etməlidir”.

Ekspertin sözlərinə görə, istər şagirdlərin, istərsə də müəllimlərin müxtəlif növ geyimlərdə, yaxud müxtəlif formada təhsil müəssisələrinə gəlmələri müşahidə olunub: “Məsələn, hansısa filmin təsiri ilə saçlarını rəngləyən, müxtəlif zinət əşyalarından istifadə edən, müxtəlif döymələri olan təhsilalan və təhsilverənlər görmüşük. İndi isə Nazirlər Kabineti bunların hamısını qadağan edir, vahid məktəbli formasını geyinməyə çağırır. Sosial bərabərlik üçün hər bir vətəndaş bu qərara hörmət etməlidir. Müvafiq Qərarın icrasına nəzarət etmək üçün müntəzəm olaraq müvafiq regional Təhsil İdarələri, Elm və Təhsil Nazirliyinin tabeli qurumları, həmçinin, məktəb rəhbərləri monitorinqlər keçirməli, lazımi tədbirlər görməlidir”.

Elçin Əfəndi qeyd edib ki, Nazirlər Kabinetinin mövcud qaydaları hər kəs üçün keçərli olduğu üçün valideynlərdə narazılıq yaratmamalıdır: “Şagirdlərin öz istədiyi formada, geyimdə məktəbə gəlməsi sosial bərabərliyin pozulmasına səbəb olur. Bu, qəbuledilməzdir. Şagirdlərin vahid məktəbli forması tam qaydasında olmalıdır. Mövcud Qərardan kənara çıxma halları olmamalıdır. Burada həm məktəb rəhbərliyi, həm müəllimlər, həm də valideynlər məsuliyyət daşımalıdır. Valideynlər övladlarını təhsil müəssisələrinə göndərərkən yalnız tələblərə uyğun geyindirməlidirlər. Müəllimlər də müvafiq olaraq şagirdin davranışında, geyim formasında hansısa çatışmazlığı müşahidə etdiyi zaman dərhal aidiyyəti üzrə məlumat verməlidir. Məktəb rəhbərliyi isə yaranmış mövcud vəziyyətlə əlaqədar olaraq tədbir görməlidir. Təbii ki, belə vəziyyətdə tələblərə riayət etməmə halı müşahidə olunarsa, valideyn dəvət olunur, müəyyən söhbət aparılır. Şagirdin təhsil hüququn təmin olunması üçün valideyn məsuliyyətini dərk etməlidir. Valideyndən qaynaqlanan əsasların aradan qaldırılması şərti ilə şagirdin təhsil hüququnun davam etməsi təhsil müəssisəsinin ixtiyarındadır. Bu baxımdan, valideyn diqqətli olmalıdır ki, övladının təhsil hüququ birbaşa onun yaratdığı imkanlara görə məhdudlaşmasın. Burada şagirdin təhsil hüququ vacibdir. Məktəb də şagirdin təhsil hüququnu qorumaq üçün çalışır”.