Tusk Konstitusiya Tribunalına hücuma görə Polşa Prezidenti və müxalifəti ittiham edib

Polşanın Baş naziri Donald Tusk Konstitusiya Tribunalının binası qarşısında baş verən hadisələri biabırçılıq adlandırıb.

APA-nın məlumatına görə, Tusk bildirib ki, ölkədə sülhün qorunması qanunsuzluğa və zorakılığa güzəştə getmək anlamına gəlməməlidir.

“Ümid edirəm ki, bir daha belə səhnələrin şahidi olmayacağıq. Lakin sülhün qorunması qanunsuzluğa və zorakılığa güzəşt demək deyil. Demokratik dövlət güclü olmalı və ədaləti təmin etməyi bacarmalıdır”, – Baş nazir vurğulayıb.

Tusk Konstitusiya Tribunalına və onun hakimlərinə hücumu qanunun aliliyinin sarsıdılması istiqamətində növbəti addım kimi qiymətləndirib.

O, baş verənlərə görə müxalifətdəki “Hüquq və Ədalət” Partiyasını, keçmiş Prezident Andjey Dudanı və hazırkı dövlət başçısı Karol Navrotskini ittiham edib.

Qeyd edək ki, Polşada Konstitusiya Tribunalının rəhbərliyi ətrafında yaranmış böhran oktyabrın 30-da qarşıdurmaya çevrilib. Tribunalın sədri Boqdan Şvençkovskinin səlahiyyətlərinin dayandırılmasından sonra bina qarşısında etirazlar keçirilib.

Prezident Karol Navrotski isə baş verənləri konstitusion qurumun zorla ələ keçirilməsi kimi qiymətləndirərək təcili siyasi məsləhətləşmələrə çağırıb.