Səfir Tacikistanın MDB-yə sədrliyi dövründə görüləcək işləri açıqlayıb

"Müstəqil Dövlətlər Birliyinə sədrliyimiz dövründə 100-dən çox tədbirin keçirilməsi və MDB-nin fəaliyyətinin mövcud çağırışlara uyğunlaşdırılması istiqamətində addımların atılması nəzərdə tutulur".

APA xəbər verir ki, bunu Tacikistanın Azərbaycandakı fövqəladə və səlahiyyətli səfiri İlhom Abdurahmon Tacikistanın 2025-ci ildə MDB-yə sədrliyinə həsr olunan mətbuat konfransında söyləyib.

O əlavə edib ki, BMT-də bu qurumla MDB arasında əməkdaşlığa dair qətnamənin qəbulu, eləcə də MDB-yə üzv olan dövlətlər arasında bərpa olunan enerji mənbələrindən, o cümlədən, 2024-2029-cu illər ərzində məişət tullantılarından istifadəyə dair konsepsiyanın inkişafı davam etdiriləcək:

"Eyni zamanda MDB-nin beynəlxalq aləmdəki nüfuzunun artırılması da prioritetlər sırasındadır. Sədrliyimiz dövründə MDB-yə üzv dövlətlər arasında əmtəə mübadiləsinin gücləndirilməsinə də diqqət yetirəcəyik. Quruma sədrlik etdiyimiz dövrdə MDB-yə üzv olan dövlətlər arasında bərpa olunan enerji mənbələrindən, eləcə də 2024-2029-cu illər ərzində məişət tullantılarından istifadəyə dair konsepsiyanın inkişafı davam etdiriləcək. O cümlədən nəqliyyat sahəsində MDB dövlətləri arasındakı transsərhəd yollarının modernləşdirilməsi istiqamətində əhəmiyyətli tədbirlərin görülməsinə, humanitar sahədə əlaqələrin genişləndirilməsinə çalışacağıq. Biz MDB-də gənclər, idman və mədəniyyət sahələrində əməkdaşlığın daha səmərəli olması istiqamətində də tədbirlərin görülməsinə çalışacağıq. Onu da bildirim ki, narkotik vasitələrin qanunsuz dövriyyəsinə qarşı mübarizə məsələsi də diqqət yetirəcəyimiz məsələlərdən olacaq".