Məhkəmə sistemində süni intellektin tətbiq olunacağı sahələr açıqlanıb

Məhkəmə sistemində süni intellektin tətbiq olunacağı sahələr açıqlanıb.

APA-nın xəbərinə görə, Ali Məhkəmənin Mülki kollegiyasının sədri, Məhkəmə-Hüquq Şurasının üzvü Sənan Hacıyev jurnalistlərə açıqlamasında deyib ki, məhkəmə sistemində, ədalət mühakiməsində süni intellektin tətbiqi ilə bağlı proqram hazırlanıb:

"Xüsusən iddia ərizələri, apellyasiya, kassasiya, şikayətləri məhkəməyə daxil olan zaman onların prosessual normalara uyğun tətbiqinin süni intellekt vasitəsilə yoxlanılması nəzərdə tutulur. Eyni zamanda, çox sadə işlər, əmr icraatı, icra icraatı qaydasında verilən ərizələ və şikayətlər, qərar layihələri süni intellekt vasitəsilə hazırlanacaq".

S.Hacıyev əlavə edib ki, bu sahədə məqsədlərdən biri də məhkəmə qərarlarının proqnozlaşdırılmasını təmin etməkdir: "Vətəndaşlar məhkəməyə müraciət edən zaman iddiasının uyğunluq dərəcəsini qiymətləndirə biləcəklər".