InvestAZ UNEC-in Zaqatala filialında master class keçirib

05 mart 2026-cı il tarixində Azərbaycan Dövlət İqtisad Universitetinin (UNEC) Zaqatala filialında “Müasir yatırım imkanları” mövzusunda Master Class təşkil olunub. Tədbir filialın rəhbərliyi, müəllim heyəti və tələbələrin iştirakı ilə baş tutub.

Tədbiri giriş sözü ilə UNEC Zaqatala filialının direktoru, i.f.d., dosent Raqif Qasımov açaraq müasir dövrdə maliyyə bazarlarının inkişafı, investisiya imkanlarının genişlənməsi və gənclərin bu sahədə biliklərinin artırılmasının əhəmiyyəti barədə fikirlərini bölüşüb. O, bu kimi maarifləndirici tədbirlərin tələbələrin iqtisadi biliklərinin formalaşmasına və praktiki bacarıqlarının inkişafına mühüm töhfə verdiyini qeyd edib.

Master Class çərçivəsində “InvestAZ İnvestisiya Şirkəti” QSC-nin Tədris və Analitika departamentinin baş mütəxəssisi, PhD Rövşən Məmmədov “Birjada qiymətin düşməsindən necə qazanmaq olar?” mövzusunda çıxış edərək maliyyə bazarlarında risklərin idarə olunması, investisiya strategiyaları və birja əməliyyatlarının əsas prinsipləri barədə ətraflı məlumat verib.

Daha sonra “InvestAZ İnvestisiya Şirkəti” QSC-nin satış üzrə 2-ci dərəcəli meneceri Rəşad Mustafayev “Rəqəmsal aktivlər: kriptovalyutanın iqtisadi və texnoloji əsasları” mövzusunda təqdimatla çıxış edib, rəqəmsal aktivlərin iqtisadi mahiyyəti, kriptovalyuta bazarının xüsusiyyətləri və bu sahədə mövcud texnoloji yanaşmalar barədə iştirakçılara məlumat verib.

Tədbirin sonunda tələbələr mövzu ilə bağlı onları maraqlandıran sualları məruzəçilərə ünvanlamış, qarşılıqlı fikir mübadiləsi aparılıb. Master Class iştirakçılar tərəfindən böyük maraqla qarşılanıb.