Ermənistanda parlament seçkilərində səsvermə başa çatıb - YENİLƏNİB

Ermənistanda növbədənkənar parlament seçkiləri üzrə səsvermə yekunlaşıb.

Ermənistan mediasının məlumatına görə, yerli vaxtla saat 08:00-da açılan seçki məntəqələri saat 20:00-da bağlanıb. Hazırda məntəqə seçki komissiyalarının üzvləri səslərin sayılmasına başlayıblar.

İlkin nəticələrin gecə saat 00:00 radələrində açıqlanacağı gözlənilir.

Mərkəzi Seçki Komissiyasının son məlumatına əsasən, saat 17:00-a olan vəziyyətə görə seçici fəallığı 48,92 faiz təşkil edib.

MSK sədri Vaaqn Ovakimyan seçici fəallığı ilə bağlı məlumatları saat 21:00-da açıqlayacaq.

***

08:25

Ermənistanda parlamentə seçkilər başlayıb.

APA xəbər verir ki, yerli vaxtla saat 8:00-da ölkə üzrə 2500 seçki məntəqəsi açılıb.

Xaricdə seçki məntəqələri açıq deyil və Ermənistan vətəndaşları yalnız ölkə daxilində səs verə bilərlər.

Mərkəzi Seçki Komissiyası seçkilərdə iştirak etmək üçün 16 partiya və iki blok qeydiyyatdan keçirib.

Rəsmi məlumatlara görə, 2,5 milyon vətəndaş səs vermək hüququna malikdir. Seçkilər seçicilərin sayından asılı olmayaraq keçərli hesab olunacaq; yeni Seçki Məcəlləsi həddi müəyyən etmir.

Vətəndaşlara hər biri üzərində partiyanın adı olan 18 bülleten verilir və onlar bunlardan birini seçib seçki qutusuna atmalıdırlar.

Seçki məntəqələri saat 20:00-da bağlanacaq. Ermənistan Mərkəzi Seçki Komissiyası ilkin nəticələri ertəsi gün, yekun nəticələri isə yeddinci gündən gec olmayaraq açıqlayacaq.