Qırğızıstan miqrantlarla bağlı beynəlxalq məhkəmədə Rusiyaya qarşı iddia qaldırıb

Qırğızıstan əmək miqrantlarının ailə üzvlərinə icbari tibbi sığorta kartı verməkdən imtina etdiyinə görə Avrasiya İqtisadi İttifaqı (Aİİ) Məhkəməsində Rusiyaya qarşı iddia qaldırıb.

APA-nın Moskva bürosu xəbər verir ki, bu barədə İcbari Tibbi Sığorta Fondunun sədri Əzəmət Mukanov yanvarın 27-də parlamentin komitə iclasında bildirib.

Onun sözlərinə görə, Aİİ-nin icbari tibbi sığorta kartının yalnız Rusiyada çalışan üzv dövlətlərin vətəndaşlarına deyil, həm də onların ailə üzvlərinə verilməsini tələb edən bir müqaviləsi var.

"Qırğızıstan Aİİ müqavilələrində göstərilən tələblərə əməl etməyən Rusiyaya qarşı iddia qaldırıb. İcbari tibbi sığorta kartı Rusiyada çalışanların ailə üzvlərinə də verilməlidir", - Mukanov deyib.

Bu məsələnin Rusiya Baş nazirinin müavini Aleksey Overçukun Qırğızıstana səfəri zamanı da qaldırıldığı bildirilib.